Александр Аксенов - Полная энциклопедия знахаря

Спаси мя от ужасов смертнаго часа и лютости тогда бесовския, спаси мя от власти духов злобных на мытарствах воздушных по смерти: яви, молю Тя, яви ми тогда пресветлое лице Твое, Владычице, и не остави мя безпомощнаго.

О, Милосердная Мати! Преклонися на милость ко мне, лишенному милости от дел моих и умоли Его же родила еси плотию Христа, Спасителя и Бога нашего. Нас ради на кресте пречистую кровь Свою излиявшаго, да и аз причастник буду Богом заслуг Его крестных пред Отцем Его, и их ради получу грехов прощение и вечное спасение и прославлю неизреченное милосердие Твое Богородице, и Твое милостивое предстательство в безконечныя веки. Аминь.

Суббота

Радуйся, Дево Богородице, Пристанище и Предстательство убогия души моея, Надеждо сладкая спасения моего! Радуйся, радость от Ангела приемшая в благовещении имеющаго воплотитися от Тебе Бога Слова! Радуйся, всех Зиждителя в Твоих ложеснах носившая! Радуйся, в Бога плотию рождшая миру Спасителя. Радуйся, в рождестве девство нетленно сохраншая! Радуйся, от волхвов дары приемшая и поклонение их от Тебе Родшемуся видевшая, и пастырей преславная о Нем словеса слышавшая! Радуйся, отрока Иисуса, Сына Твоего и Бога во храме среди законоучителей обретшая радостно! Радуйся, болезни лютыя в страдании крестном, распятии и смерти Сына Твоего, пресладкаго Иисуса, испытавшая, воскресением же Его тридневным обрадованная светло! Радуйся, вознесение Сына Твоего и Бога, со ученики Его во славе небесней видевшая! Радуйся, от Него ниспосланнаго Духа Святаго, в горнице Сионстей в виде огненных языков нисшедшаго со ученики Господни приемшая! Радуйся, на земле ангельски пожившая! Радуйся, чистотою и святынею вся ангельския чины и всех святых лики превосходящая! Радуйся, возвеличенная славою пришестием к Тебе Сына Твоего и Бога! Радуйся, Того святым рукам душу Свою радостно предавшая! Радуйся, славно превознесенная Твоим на небеса с телом восшествием! Радуйся, по преставлении твоем боговидцам Апостолам в третий день явльшаяся! Радуйся, на небесех от Отца и Сына и Святаго Духа диадимою вечнаго царствия увенчанная! Радуйся, от всех небесных сил приснопеваемая! Радуйся, близ престола Персвятыя Троицы на престоле славы возседящая! Радуйся, Бога с человеки примерения Виновнице; Радуйся, небесными и земными господствующая Царице! Радуйся, яко ничтоже невозможно есть Твоему ходатайству! Радуйся, яко вси верно к Тебе притекающии спасаются! Радуйся, яко Тобою скорбящии утешение, болящии исцеление, бедствующии благовременную помощь получают! Молю убо Тя, обрадованная Владычице: потреби и во мне печаль греховную и даждь ми радость спасения, даждь ми слезы утешительныя, умиление всегдашнее, покаяние истинное и исправление совершенное. Не возгнушайся мене, Владычице, но приими милостиво сии гласы радостныя, мною убогим Тебе приносимыя, и предстаними в помощь во время безпомощия моего в час страшный оный, егда разлучитися имать душа моя от окаяннаго моего тела: тогда молю, предстани, ми в помощь и избави мя, повиннаго во гресех, наказания за них вечнаго, да не явлюся радование бесом и пища геене огненной, Ей, Владычице моя, не попусти узрети души моей страшнаго и грознаго прещения и истязания демонскаго, грешникам уготованнаго, но предвари и спаси мя раба Твоего в час оный ужасный, да славлю Тя во веки, едина Надеждо моя и Ходатаице спасения моего. Аминь.

Исповедую Господу Богу моему пред тобою, отче честный, вся моя безчисленная прегрешения, яже сотворих до настоящаго дне и часа: делом, словом, помышлением. Ежедневно и ежечасно согрешаю неблагодарностью к Богу за Его великия и безчисленныя мне благодеяния и всеблагое промышление о мне, грешном.

Согрешил: празднословием, осуждением, презорством, непокорством, гордостью, немилосердием, завистью, гневом, оклеветанием, невниманием, нерадением, небрежением, дерзостью, раздражительностью, нарушением заповедей отеческих, унынием, злопом-нением, воздаянием зла за зло, ожесточением, преслушанием, роптанием, самооправданием, прекословием, самочинием, самоволием, укорением, злоречием, ложью, смехом, соблазном, самолюбием, честолюбием, чревоугодием, излишеством в пище и питии: тайнодеянием, тайнопитием (пьянством), вещелюбием, тщеславием, леностию, принятием блудных нечистых помыслов, со услаждением и замедлением в них, сладострастными мечтаниями и истецаниями.

Согрешил: многоспанием, нечистым воззрением, опущением службы Божией по лености и небрежению, дреманием и шептанием в церкви, опозданием к началу служб церковных, разсеянностию на молитве церковной и келейной, неисполнением в точности келейнаго монашескаго канона.